Грийн Инсайт ХХК нь Азийн Сангийн Монгол дахь Суурин төлөөлөгчийн газартай хамтран “Let’s Read Mongolia” төслийн хүрээнд хамтын ажиллагааны санамж бичиг байгууллаа.
Энэхүү түншлэлийн хүрээнд талууд сургуулийн өмнөх насны хүүхдүүдэд зориулсан чанартай номын хүртээмжийг нэмэгдүүлэх, унших соёлыг төлөвшүүлэх орчныг бүрдүүлэхэд хамтран ажиллана. Тодруулбал, хүүхдүүдийн нас, сэтгэхүйн онцлогт тохирсон ном зохиолыг олон нийтэд хүргэх, “номын булан”-гуудыг бий болгож уншлагын орчныг сайжруулах зорилготой.
Мөн төслийн хүрээнд судалгаанд оролцогчдод нийгмийн сайн үйлсэд оролцох боломжийг бүрдүүлж, өөрт олгогдох урамшууллаа хүүхдийн боловсролыг дэмжих үйлсэд сайн дураараа хандивлах сонголтыг нээж байна. Ингэснээр оролцогч бүрийн хувь нэмэр бодит үр дүнд хүрч, хүүхэд бүрийн суралцах боломжийг дэмжихэд чиглэнэ.
Түүнчлэн талууд ил тод, нээлттэй зарчмыг баримтлан, хандивын зарцуулалт болон төслийн хэрэгжилтийн явцыг тогтмол тайлагнах бөгөөд хамтын ажиллагаагаа урт хугацаанд тогтвортой үргэлжлүүлэхээр зорьж байна.
Энэхүү түншлэл нь Монгол хүүхэд бүрийн боловсролд хөрөнгө оруулалт болж, ирээдүйн хөгжилд бодит хувь нэмэр оруулах ач холбогдолтой юм. Хүүхдийн боловсролыг дэмжих үйлсэд бидэнтэй хамт байгаа оролцогч, түнш байгууллагууддаа талархал илэрхийлье.
Үзэл бодлоо хуваалцсан
