Маркетингийн шийдвэрийг өнөөдөр ч гэсэн “манай хэрэглэгчид ийм байх”, “энэ контент таалагдах байх”, “энэ сувгаар сурталчилбал үр дүнтэй байх” гэх таамаглалд үндэслэн гаргах тохиолдол цөөнгүй байдаг. Гэвч зах зээл, хэрэглэгчдийн зан төлөв урьд өмнөхөөсөө илүү хурдацтай өөрчлөгдөж байгаа энэ үед таамаглалд суурилсан маркетинг нь зөвхөн үр ашиггүй зардал биш, бизнесийн өсөлтийг хязгаарлах эрсдэл болж байна.
Сүүлийн үеийн судалгаанаас харахад дэлхийн интернет хэрэглэгчдийн 73% нь бүтээгдэхүүн, үйлчилгээ худалдан авахаасаа өмнө сошиал сувгуудаар дамжуулан брэндийн талаар мэдээлэл хайдаг болсон байна. Өөрөөр хэлбэл хэрэглэгчийн шийдвэр гаргах үйл явц улам бүр мэдээлэлд тулгуурлаж байгаа бөгөөд брэндүүд ч мөн адил шийдвэрээ дата дээр үндэслэх шаардлагатай болжээ.
Хэрэглэгч өөрчлөгдөж байхад маркетинг хэвээрээ үлдэж болохгүй
Өнөөдрийн хэрэглэгчид хэдхэн жилийн өмнөхөөс эрс өөр болсон. McKinsey-ийн 2025 оны судалгаанд дэлхийн 18 зах зээл дэх 25,000 гаруй хэрэглэгчийг хамруулсан бөгөөд хэрэглэгчдийн худалдан авах зан төлөв, мэдээлэл авах арга хэлбэр, брэндээс хүлээх хүлээлтүүд тогтмол өөрчлөгдөж байгааг онцолсон байна.
Гэвч олон байгууллага хэрэглэгчдийн шинэ хэрэгцээ, хандлагыг судлахын оронд өмнө нь амжилттай байсан арга барилаа давтсаар байдаг. Үүний үр дүнд хэрэглэгчийн сонирхлыг татахгүй контент бүтээх, буруу мессеж хүргэх, улмаар маркетингийн үр ашиг буурах нөхцөл үүсдэг.
Маркетингийн хамгийн үнэтэй алдаа бол буруу шийдвэр биш, мэдээлэлгүй шийдвэр юм
Байгууллагууд маркетингийн төсвөө ихэвчлэн контент бүтээх, сурталчилгаа явуулах, инфлюэнсер хамтрал хийх зэрэгт зарцуулдаг. Харин судалгаа хийхэд зориулсан төсвийг зардал гэж үзэх хандлага түгээмэл байдаг.
Гэвч бодит байдал дээр судалгаагүй маркетинг илүү өндөр өртөгтэй тусдаг.
Жишээлбэл, сошиал медиа хэрэглэгчид өдөрт дунджаар 2 цаг 20 минут орчим хугацааг олон нийтийн сүлжээнд өнгөрүүлдэг ч бүх хэрэглэгч ижил платформ ашигладаггүй. Хэрэв танай зорилтот хэрэглэгч TikTok дээр байгаа байхад Facebook-д төсвийнхөө ихэнх хэсгийг зарцуулж байгаа бол асуудал нь сурталчилгааны чанарт бус, мэдээллийн дутагдалд оршиж байгаа юм.
Өөрөөр хэлбэл маркетингийн төсөв алдагдаж байгаа гол шалтгаан нь ихэнхдээ төсөв багадаа биш, харин шийдвэр гаргахдаа дата ашиглаагүйд байдаг.
Өрсөлдөөн бүтээгдэхүүнээр бус ойлголтоор явагдаж байна
Зах зээл дээр ижил төрлийн бүтээгдэхүүн, үйлчилгээ санал болгодог олон брэнд бий. Ийм нөхцөлд хэрэглэгч яагаад нэг брэндийг нөгөөгөөс нь сонгодог вэ?
Хариулт нь хэрэглэгчийн ойлголт, хандлага, туршлагад байдаг.
PwC-ийн хэрэглэгчийн туршлагын судалгаагаар хэрэглэгчдийн 52% нь бүтээгдэхүүн эсвэл үйлчилгээний муу туршлагаас болж тухайн брэндийг орхисон гэж хариулжээ. Мөн 29% нь хэрэглэгчийн үйлчилгээ, харилцааны сөрөг туршлагаас болж худалдан авалтаа зогсоосон байна.
Хэрэв байгууллага хэрэглэгчдийн сэтгэл ханамж, брэндийн талаарх ойлголт, худалдан авалтын шалтгааныг тогтмол хэмждэггүй бол зах зээл дээрх бодит байр сууриа буруу үнэлэх эрсдэлтэй.
Дата ашиглаж буй компаниуд өрсөлдөөний давуу тал бий болгож байна
Сүүлийн жилүүдэд дэлхийн томоохон компаниуд маркетингийн төсвөөсөө илүүтэйгээр хэрэглэгчийн дата, аналитик, хиймэл оюун ухаанд хөрөнгө оруулах болсон. Зар сурталчилгааны салбарын дэлхийн том тоглогчдын нэг болох Publicis Group хүртэл өсөлтийнхөө гол хүчин зүйлсийн нэгийг дата болон зорилтот маркетинг гэж тодорхойлсон байна.
Учир нь дата нь зөвхөн өнөөдрийн нөхцөл байдлыг харуулаад зогсохгүй ирээдүйн эрэлт, шинэ сегмент, хэрэглэгчийн өөрчлөгдөж буй хэрэгцээг урьдчилан харах боломж олгодог.
Өөрөөр хэлбэл зах зээлийн судалгаа нь "юу болсон бэ?" гэсэн асуултад хариулахаас гадна "цаашид юу болох вэ?" гэсэн стратегийн ойлголтыг өгдөг.
Үзэл бодлоо хуваалцсан
