Таны таамаг бизнесийг чинь өсгөх үү, унагах уу?
“Манай хэрэглэгчид энэ бүтээгдэхүүнийг авах нь ойлгомжтой.”
“Үнэ жаахан өссөн ч хүмүүс авсаар л байна.”
“Энэ санаа бол гарцаагүй амжилттай.”
Бизнес эрхлэгч бүрт ийм итгэл төрж байсан байх.
Заримдаа бидний таамаг үнэхээр зөв байдаг. Олон жилийн туршлага, хэрэглэгчтэй өдөр бүр харилцсан мэдрэмж, зах зээлийн ажиглалт бидэнд тодорхой зөн совин өгдөг.
Гэхдээ нэг асуудал бий.
Таны өмнө нь зөв байсан таамаг дараагийн удаа ч зөв байна гэсэн баталгаа биш.
“Би мэдэж байна” гэдэг хамгийн үнэтэй алдаа болж магадгүй
Шинэ бүтээгдэхүүн гаргах, шинэ салбар нээх, үнээ өөрчлөх, шинэ зах зээлд орох бүрд бизнесүүд олон шийдвэр гаргадаг.
Гэхдээ зарим шийдвэрийн цаана ганцхан үндэслэл байдаг.
“Миний бодлоор хүмүүс үүнийг хүсэж байгаа.”
Тэгвэл үнэхээр тийм үү?
Таны хэрэглэгч яг юунд мөнгө төлөхөд бэлэн байна?
Тэд яагаад таныг өрсөлдөгчөөс тань сонгодог вэ?
Үнэ өсвөл үнэхээр үлдэх үү?
Шинэ бүтээгдэхүүн тань хүмүүст хэрэгтэй юу, эсвэл зөвхөн танд л гоё санаа санагдаж байна уу?
Эндээс л таамаг ба бодит байдал хоёр өөр замаар явж эхэлдэг.
Таамаг буруу байх нь асуудал биш. Оройтож мэдэх нь асуудал.
Төсөөлөөд үзье.
Та шинэ бүтээгдэхүүндээ хэдэн сар ажиллаж, үйлдвэрлэл, сав баглаа боодол, маркетинг гээд их хэмжээний хөрөнгө оруулалт хийлээ.
Багийнхан бүгд итгэлтэй.
Гэтэл бүтээгдэхүүн зах зээлд гараад… хүмүүс худалдаж авсангүй.
Бүтээгдэхүүн муу байсан гэсэн үг биш.
Зүгээр л хэрэглэгчийн хүссэн зүйл өөр байсан.
Хэрэв үүнийг бүтээгдэхүүнээ үйлдвэрлэхээс өмнө мэдсэн бол?
Магадгүй та хэдхэн асуулт, хэрэглэгчийн судалгаа эсвэл жижиг туршилтаар хэдэн сая төгрөгийн алдаанаас зайлсхийж болох байсан.
Судалгааны зорилго бол таны санааг зөв гэдгийг батлах биш. Харин буруу байж болох зүйлээ эрт илрүүлэх юм.
Том компаниуд л дата ашиглах ёстой гэж үү?
Үгүй.
Дата гэдэг заавал асар том dashboard эсвэл мянга мянган хүний судалгаа гэсэн үг биш.
Жижиг бизнес ч гэсэн дараах асуултаас эхэлж болно:
-
Манай хамгийн ашигтай хэрэглэгч хэн бэ?
-
Хүмүүс яагаад худалдан авалт хийхгүй байна?
-
Аль бүтээгдэхүүн хамгийн их ашиг авчирдаг вэ?
-
Манай маркетингийн аль суваг бодит борлуулалт авчирч байна?
-
Хэрэглэгчид биднийг яагаад дахин сонгодоггүй вэ?
Эдгээр асуултын хариултыг “миний бодлоор” гэж биш, бодит мэдээллээр олох нь л чухал.
Зөн совин хэрэггүй гэсэн үг үү?
Огтхон ч биш.
Туршлагаас бий болсон бизнесийн мэдрэмж маш үнэ цэнтэй.
Гэхдээ хамгийн ухаалаг бизнес эрхлэгч:
“Миний мэдрэмж зөв.” гэж шийдвэр гаргадаггүй.
Харин:
“Миний мэдрэмж ингэж хэлж байна. Одоо үүнийг датаар шалгая.” гэж ханддаг.
Таны зөн совин санааг гаргаж болно.
Харин судалгаа тэр санаанд хөрөнгө оруулах эсэхийг шийдэхэд тусална.
Дараагийн том шийдвэрийнхээ өмнө өөрөөсөө асуугаарай:
Би үүнийг үнэхээр мэдэж байна уу?
Эсвэл
зүгээр л тааж байна уу?
Учир нь таамаг зөв бол таны бизнесийг өсгөж чадна.
Харин буруу таамгийг баримт мэт хүлээж аваад хөрөнгө оруулбал, бизнесийг чинь ч унагаж мэднэ.
Шийдвэр бүрийн өмнө таамаглаж болохгүй. Эхлээд шалга. Дараа нь шийд.
Үзэл бодлоо хуваалцсан
